Nyanza: Urubanza rw’umwana w’imyaka 16 ukekwaho uruhare mu kwica mukase rwashyizwe mu muhezo
Urukiko rw’Ibanze rwa Busasamana mu Karere ka Nyanza rwafashe icyemezo cyo kuburanisha mu muhezo urubanza rw’umugabo n’umuhungu we baregwa kwica umugore.
- Urubanza rw'umwana w'imyaka 16 ukekwaho kwica rwashyizwe mu muhezo kugira ngo aburane mu buryo bwihariye.
- Umugore w’imyaka 25, Mukandekwe Clementine, yasanzwe yapfuye mu nzu, umugabo we akavuga ko yakinguye asanga amanitse.
- Umuhungu ukurikiranyweho iki cyaha si umwana wa nyakwigendera, ahubwo ni mukase we, akaba afungiye kuri RIB ya Busasamana.
Ku wa 8 Nzeri 2026, aba bombi bagejejwe imbere y’urukiko kugira ngo baburane ku ifungwa n’ifungurwa ry’agateganyo.
Umucamanza yahise ategeka abari mu rukiko bari baje gukurikirana iburanisha gusohoka, kubera ko umwe mu baregwa ari umwana w’imyaka 16.
Amategeko ateganya ko abana batarageza ku myaka y’ubukure baburanira mu muhezo.
Mu gicuku cyo ku wa 20 Kanama 2026, umugore w’imyaka 25 witwa Mukandekwe Clementine yasanzwe yapfuye mu nzu.
Nyakwigendera yari mu nzu, umugabo we usanzwe utwara imodoka avuga ko yakinguye, asanga umugore amanitse mu mishumi y’inkweto yapfuye, maze yihutira kumanura umurambo ndetse anakangura umuhungu we wararaga mu nzu zo hanze.
Umugabo yatabaje abaturanyi, bagiye kureba basanga umugore yamaze gupfa.
Ubushinjacyaha bwasabiye abaregwa gufungwa iminsi 30 y’agateganyo naho abaregwa bo basaba ko bakurikiranwa badafunze kuko nta perereza bakwica kandi hanashingiwe ko umuhungu yari umunyeshuri wari ugiye kwiga mu mwaka wa gatandatu w’amashuri yisumbuye.
Umuhungu ukurikiranyweho iki cyaha ntabwo ari umwana wa nyakwigendera, ahubwo yari amubereye mukase. We na se bafungiwe kuri sitasiyo ya RIB ya Busasamana.
Umucamanza azatangaza icyemezo ku ifungwa n’ifungurwa ry’agateganyo ku wa 11 Nzeri 2026.
